लमजुङको बेंसीशहर नगरपालिका ३, बाहुनबेंसी स्थायी घर भइ हाल दाङको घोराही बस्दै आएका उत्सव घिमिरे कक्षा १२ को परीक्षामा नेपाल प्रथम भएका छन् ।
घोराहीको गोरखा इन्टरनेसनल पब्लिक सेकेन्डरी स्कुलबाट कक्षा १२ को परीक्षा दिएका घिमिरेले ३.९६ जीपीए प्राप्त गरेका छन् । राष्ट्रिय परीक्षा बोर्डले सार्वजनिक गरेको नतिजा अनुसार घिमिरे नेपाल प्रथम भएको दावी गरिएको छ ।
घिमिरेले २०७८ को माध्यमिक शिक्षा परीक्षा (एसईई) मा ३.९५ जीपीए ल्याएर जिल्ला प्रथम भएका थिए ।
वि.सं. २०६० सालमा दाङ पुगेका घिमिरे परिवारले बच्चाहरुलाई उक्त ठाउँमा पढाउँदै आएका थिए । परिवारका अनुसार कक्षा १ मा भर्ना भएदेखि परीक्षामा सधैं प्रथम भएका उत्सव अतिरिक्त क्रियाकलापमा पनि पहिलो वा दोस्रो हुँदै आएका विद्यार्थी हुन् ।
उत्सवका बुवा उत्तम घिमिरेका अनुसार छोराले भविष्यमा डाक्टर बन्ने लक्ष्य बताउनुभयो ।