पहिरोमा परेर परिवार गुमाएका लमजुङको क्व्होलासोथार गाउँपालिका ३, बगुमका ११ वर्षिय निरज गुरुङलाई बेंसीशहरस्थित युनिभर्सल एकेडेमीले १२ कक्षा सम्म पढाउने भएको छ ।
बेंसीशहरमा आइतबार पत्रकार भेटघाट कार्यक्रमको आयोजना गरी एकेडेमीले कक्षा ५ मा गुरुङ भर्ना भइसकेको र कक्षा १२ सम्म पढाउने घोषणा गरेको हो । यसका लागि एकेडेमी सञ्चालक समितिका सदस्य एवं पर्यटन व्यवस्थापन समिति स्मार्ट भिलेज घलेगाउँका अध्यक्ष प्रेमबहादुर घलेले सक्रिय भूमिका खेल्नुभएको छ ।
असार ११ गते रातीको पहिरोले निरजका आमा ३७ वर्षिय पञ्चकुमारी गुरुङ, निजरका बहिनी ५ वर्षिया निष्मा गुरुङ र हजुरबुवा ७० वर्षिय रुद्रमान गुरुङको निधन भएको थियो । निरज भने बर्खे बिदा भएपछि छिमेकी गाउँ घाम्राङबाट फर्केका काका नाता पर्ने अमर गुरुङसंग सुत्न गएका कारण जोगिए । हजुरआमा लिलाकुमारी नजिकै घनपोखराको फ्रेंजोस्थित छोरीज्वाइँको घर गएका कारण जोगिएका छन् । निरजका बुवा कुमबहादुरको ४ वर्षअघि करेन्ट लागेर निधन भइसकेको छ । 
घलेउत्तरकन्या मावि कक्षा ६ मा पढ्दै आएका निरजले विपदका कारण बुवाआमा र बैनीसहित परिवार नै गुमाएपछि युनिभर्सले एकेडेमीले कक्षा १२ सम्म पढाउने निर्णय गरेको प्रिन्सीपल बिमल अधिकारीले बताउनुभयो । उहाँका अनुसार एकेडेमीको सामाजिक उत्तरदायित्व अन्तरगत गरीब, जेहेन्दार तथा असाहय १० प्रतिशतलाई छात्राबृत्ति प्रदान गरिएकोमा निरजलाई पूर्ण रुपमा छात्राबृत्ति प्रदान गरिने छ । 
कार्यक्रममा एकेडेमी सञ्चालक समिति अध्यक्ष ओमबहादुर घिमिरे, सञ्चालक मोहनबहादुर थापा, चीनबहादुर केसी, स्थानीयवासिन्दा समेत रहनुभएका हुलाक कार्यालय प्रमुख गंगाबहादुर घलेलगायतको उपस्थिति थियो ।
एकेडेमी सञ्चालक सदस्य घलेका अनुसार निरजलाई छात्रावासमा राखेर पढाउने व्यवस्था गरिएको छ । यसका लागि ५० प्रतिशत छुटमा राखेर पढाउने सहमति छात्रावास सञ्चालकहरुसंग सहमति भएको छ । यसबाहेकका शुल्क निरजका नाममा जम्मा हुने रकमको व्याजबाट बुझाइने उहाँले बताउनुभयो ।
कृषक जागरण वचत तथा ऋण सहकारी संस्था लिमिटेडका अध्यक्ष समेत रहनुभएका प्रेमबहादुर घलेले निरजलाई स्टेशनरी खर्चबापत वार्षिक १० हजार रुपैयाँ दिइने बताउनुभयो । विद्यार्थी पुस्तक पसलले निरजलाई निःशुल्क कितावको व्यवस्थापन गरेको छ । 
क्व्होलासोथार गाउँपालिका ३ का वडाअध्यक्ष आसबिर गुरुङले गाउँपालिकाको तर्फबाट किरियासहित तत्काल खर्चका लागि ७१ हजार ९ सय ४० रुपैयाँ पहिरोपीडितलाई सहयोग गरिएको बताउनुभयो । वडाले १० हजार रुपैयाँ प्रदान गरेको थियो । रेडक्रस सोसाइटीले भाँडाकुँडा र लत्तकपडा, एक्यापले पहिरो पीडित घरपरिवारलाई १५–१५ हजार रुपैयाँ, पोंचुकों तमू समाज पोखराले १५ हजार, तिजे उत्तरकन्या कृषि सहकारीबाट १३ हजार रुपैयाँ सहयोग गरिएको उहाँले बताउनुभयो । सहयोग रकमका लागि गाउँस्थित आदर्श युवा क्लवले समन्वय गरिरहेको छ ।
पीडितलाई उत्तरकन्या रिल्दी घले समाज रामपुर चितवनले १ लाख ८० हजार रुपैयाँ प्राप्त भएको छ । कतारबाट पीडित बालकका कान्छाबुवा हेमजङ गुरुङका साथी हेमन्त सारुमगरको नेतृत्वमा संकलन गरिएका १ लाख १६ हजार रुपैयाँ २५ मध्ये ५० हजार रुपैयाँ बालकलाई हस्तान्तरण गरिएको छ । ६६ हजार २५ रुपैयाँ बालकका हजुरआमा लिलाकुमारीलाई प्रदान गरिएको छ । पीडित परिवारलाई संघीय सरकारका तर्फबाट ७ लाख रुपैयाँ राहत प्रदान गरिसकिएको जिल्ला प्रशासन कार्यालयले जनाएको छ ।