क्व्होलासोथार गाउँपालिका ३, घलेगाउँका किसानले एसी प्रयोग गरेर १८ डिग्रीमा उत्पादन हुने च्याउ एसीको प्रयोग नगरी २३ डिग्रीमै फलाएका छन् । 
हेटौंडाबाट बीउ र मल ल्याएर उनीहरुले गाउँमै टनेल बनाएर चिसो ठाउँमा हुने गोब्रे च्याउ फलाएका हुन् । ग्रामीण सामुदायिक विकास केन्द्र (आरसीडीसी) को युवा आर्थिक उत्थानशील परियोजनामार्फत गाउँका युवा कृषकहरुले च्याउ फलाएका हुन् ।
घलेगाउँका ८ जना कृषक मिलेर घलेगाउँ सामुदायिक कृषि फर्म स्थापना गरी गाउँ नजिकै ‘गाँडस्यो उ’ भन्ने ठाउँमा २ वटा टनेल राखेर च्याउ खेती गरेका हुन् । एउटा टनेलमा ६० वटा प्लाष्टिकमा मल प्रयोग गरी गोब्रे च्याउ खेती गरिएकोमा उत्पादन दिन थालेको फर्मका सविच दीपक गुरुङले जानकारी दिनुभयो । उक्त च्याउ पर्यटकलाई खुवाउनेदेखि लिएर कोसेली पठाउने गरिएको छ । उक्त च्याउ प्रतिकिलो ६ सय रुपैयाँमा विक्री गर्ने उनीहरुले बताएका छन् ।
कटुसको मुढामा लगाएको च्याउ भने उत्पादन हुने समय नभएको किसानहरुले बताएका छन् । उनीहरुले ६ सय ५० वटा मुढा ल्याएर टनेलमा सिताके च्याउको खेती थालेका छन् । एउटा मुढामा ३० किलोसम्म च्याउ फल्ने कृषि प्राविधिकहरु बताउँछन् । यो च्याउलाई स्थानीयले प्रतिकिलो ८ सय रुपैयाँसम्म विक्री गर्ने बताएका छन् ।
च्याउ खेतीका लाग आरसीडीसी–युवा आर्थिक उत्थान परियोजनाले करिब ५ लाख रुपैयाँ सहयोग गरेको परियोजनाका वित्त अधिकृत तुलानीधि दनाईंले बताउनुभयो । उहाँका अनुसार  फलामे पोल, प्लाष्टिक, जाली, बाँस, बीऊ, मललगायत परियोजनाले सहयोग गरेको छ । 
फार्मका अध्यक्ष हर्क घलेले च्याउ टनेलको सुरक्षार्थ वरिपरि तालजाली लगाइएको बताउनुभयो । टनेल निर्माणदेखि तारजाली लगाउने कार्य कृषकले श्रमदानबाट गरेको उहाँले बताउनुभयो । च्याउ खेतीका लागि आरसीडीसी–युवा आर्थिक उत्थाशील परियोजनाले ८० प्रतिशत र कृषकले २० प्रतिशत लगानी गरेका छन् ।
युवा आर्थिक उत्थानशील परियोजना प्रमुख सुजाता पौडेलले विशेष गरी युवा, विदेशबाट फर्किएका, महिला तथा साना किसानहरुको क्षेत्रमा परियोजना सञ्चालनमा रहेको छ । उनीहरुको आर्थिक स्थिति सुधार्न तथा आयआर्जनको लागि सहयोग गरिएको उहाँले बताउनुभयो । घलेगाउँमा गरिएको च्याउ खेतीबारे एकसाता अघि अनुगमन समेत गरिएको थियो ।